كلام القلب
ساكت القلب و فى ملكوته سارح
ساكت و مش باين عليه ملامح
مغمض عينه و فارد جناحه
ايد فى الهوا و التانية على سلاحه
و كأنه حامى حمى الأرض
ساكت القلب و غرقان فى السكون
لا طلعت منه همزة و لا حتى نون
ساكت القلب بس حقيقى مش ساكت
لكن الدنيا لا سمعت و لا شافت
كلامه اللى مالى السما و الأرض
ساكت القلب لكنى سامع مغناه
صوت خفيت، حاجات كتير جواه
ساكت القلب لكن سكوته كلام
ما يفهمه إلا من سمع و ادى لقلبه ودان
و من سمع قلبه ملك كنوز الأرض
مين فينا يوم حاول صحيح يفهم
كلام القلب و كلامه دا...بلسم
مين فينا شاف فى قلبه ألوان
مين فينا شاف فى القلب إنسان
مين شاف فى قلبه خضار الأرض
اسمع لقلبك و افتحله عقلك
تلاقى الدنيا شبه المشبك
ساعات بتمسك...ساعات ترخِى
لونها اسود و لونها بنبى
نقى لونك و املا بيه الأرض
حاجة كدا لمن يهمه الأمر الرسمة برده رسمتى ;)
8 comments:
الله عليك ياورده يابيضه
أكثر ماعجبني في كلامك هو العلاقة التي تدعو لها في قولك
( اسمع لقلبك و افتحله عقلك )
أن تكون العلاقة وطيده بين العقل " الفكر " وبين القلب " العاطفة " يحدث حينها التوازن ومن ثم الحكمة والتميز
ياأيما المتميز (:
أيوا كدا متغبش عن المدونة كتير يانرجس
و ليك عين تتكلم اصلا.....بعد اللي انتا عملته
تسافر كدا من غير ما تقول شررم حتي...
و جاي تكتب مدونة و قال ايه...متوقع اني اقراها
هأ
و عجبي...
مصعب أفندى...احنا تلاميذك يا بشبوش :))
***********
السيد الكريم كريم :D
أولا يا كابتشن انا كنت قايلك انى مسافر، ثانيا طلعت أكرم منى يا عم و نورتنى على المدونة :)
واحشنى
السلام عليكم جميله جدا ما شاء الله و الرسمه اجمل و اجملفى انتظار مزيد من الابداعات
عارف ... المشكلة إن أوقات كلام القلب بيوجع قوي
تفتكر ساعتها أسمعله و لا أطنش ؟؟؟
محمد
عمور...فينك يا كابتشن؟ شكرش يا باشا على التعليق دا بس من ذوقك و الله :)
****
ياااااااه فينك يا عم فضفضة من زمان :)
هو انا رأيى إن الواحد لازم دايما يسمع لقلبه، و ياخد منه الجزء الإيجابى حتى لو كان بيوجع، ساعات الوجع بيكون حاجة محتاجينها علشان نبدأ نغير فى حياتنا...هذا و الله أعلم
نشرف بزيارتكم لنا :)
رائع اسلوب تعبيرك
لكن ودا رائى الخاص ان القلب ينصت للاحتياجه وليس من الشرط ان العقل او الفكر يتقبل ذلك...............
أستاذة منى
شكرا لمرورك
:)
Post a Comment