خبّطت على بابه

خبّطت و كلّى شوق و محبة
حسيت بخوف و برد و رعشة
بعد سنين عايشها فى غربة
مش غربة بلدى و أهلى و ناسى
غربة ربى...اللى خلقنى
اللى ادانى عينى و لسانى
اللى فتحلى كل أبوابه
اللى ادانى من غير ما أتمنى
وقفت و خبطت على بابه
جيبت أتكلم...لقيتنى بتهته
جيبت أحكيله لقيتنى بتهته
وقفت أقوله يا ربى بحبك
و حكت دموعى كل اللى فى قلبى
بصوت مخنوق من كتر البكا
وقفت بنادى يا رب السما
بصوت خايف و حزين
وقفت أقول يا رب غيرك ليا مين؟
بدمع بيجرى على خدى سيول
بقلب بيبكى و علا صوت بكاه
بوش ساجد و أنفه فى التراب
زى طفل تايه حيران مذهول
زى حبيب مستنى يوم لقاه
زى حسرة من جرى ورا السراب
جيت بنادى يا رب يا رحيم
اقبل عبد جالك و كله حنين
اقبل من وقف يخبّط رغم توهانه سنين
ضم قلبى يا ربى و اشفى جراحه
و ازرع فى قلبى إيمان
من غيره عبادك ما يرتاحوا

الإمتحانات...بح!!

السلام عليكم و رحمة الله و بركاته

ازييييييييييكم؟ أعتذر بشدة عن عدم التدوين فى الفترة السابقة، بسبب الإمتحانات، و بالإضافة ان جهازى عنده الحالة، بس إن شاء الله هكتب قريب :)

النظام يخاطب شعبه الحبيب

هو الصراحة أنا كنت قلت انى مش هكتب لحد أما أخلص امتحانات، بس لقيت الزجل دا اتبعتلى على الميل، فمقدرتش أمسك نفسى، و أهه يعتبر برده ما كتبتش علشان السلطات ماتزعلش بس :))

ياشعبي حبيبي ياروحي يابيبي ياحاطك في جيبي ياإبن الحلال
ياشعبي ياشاطر ياجابر خواطر ياساكن مقابر وصابر وعال
ياواكل سمومك يابايع هدومك ياحامل همومك وشايل جبال
ياشعبي اللي نايم وسارح وهايم وفي الفقر عايم وحاله دا حال
أحبك محشش مفرفش مطنش ودايخ مدروخ وآخر انسطال
أحبـك مكبـر دماغـك مخـدر ممشـّي أمورك كـده باتكال
واحب اللي ينصب واحب اللي يكدب واحب اللي ينهب ويسرق تلال
واحب اللي شايف وعارف وخايف وبــالع لســانه وكاتم ماقال
واحب اللي قافل عيونه المغفل واحب البهايم واحب البغال
واحب اللي راضي واحب اللي فاضي واحب اللي عايز يربي العيال
واحب اللي يائس واحب اللي بائس واحب اللي مُحبط وشايف محال
واحبك تســـافر وتبعد تهاجــر وتبعت فلوسك دولار أو ريال
واحبك تطبـّل تهـلل تهبـّـل عشان ماتش كورة وفيلم ومقال
واحبـك تأيــّد تعضّـد تمجّــد توافق تنافق وتلحس نعال
تحضّر نشـادر تجـمّع كوادر تلمـّع تقمـّع تظبـّط مجـال
لكن لـو تفكـّر تخـطط تقـرر تشغللـّي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللي روحك مفرد رجال
ساعتها هاجيبك .. لايمكن أسيبك وراح تبقى عبرة وتصبح مثال
هابهدل جنابك واذل اللي جابك وهيكون عذابك دا فوق الاحتمال
وامرمط سعادتك واهزأ سيادتك واخللي كرامتك في حالة هزال
وتلبس قضية وتصبح رزية وباقي حياتك تعيش في انعزال
هتقبل هاحبك .. هترفض هلبـّك هتطلع هتنزل هاجيبلك جمااااال *

. . .

*طبعا جمال هنا مقصود بيه جمال الدين الأصفهانى بتاع كتاب الأغانى علشان يعلمنا الأدب يعنى :)