Sunday, December 30, 2007

.... ليك


قلبى حيران و صار الحزن غنايا
بشوق و حنين مالينى جوايا
بدمعة قلبى على خدى
بأنينى و بكايا
بدعى و بقول يا رب
********
يا عالم كل الخبايا
يا عالم بالصدور...بالنوايا
عليك ما بتخفى الخفايا
يا عالم بالنظرة
و اللمسة
بالكلمة
و الهمسة
بكل نقطة ميا فى الأرض أو فى السما
بكل ورقة شجر طايرة فى الهوا
بكل نسمة بتهب فينا...تملا نفوسنا بالهنا
بكل طفل لسة جوة الحشا
بكل همسة ههمستها...
بكل جملة قلتها...
بكل حاجة كتمتها...
بكل كلمة كتبتها...
بكل رسمة رسمتها...
بكل فعلة عملتها...
فى النور...
أو بعيد عن عيون انت اللى خلقتها

************

بكاف و نون
كل ما تريد بيكون
أنا ليك و منك و إليك
أنا عبدك جيت أناجيك
جيت أقولك على كل حاجة جوايا
جيت أقولك على كل ذنب
على كل كرب
على كل هم...عايش جوايا
على كل ذنب رجعتله
على شوقى و منايا
على حبى ليك
و ضعف جسمى و أنا واقف بين ايديك
على رعشة قلبى لما آجى أناديك
على دمعة عينى و خوفى من نارك
على فرحتى إنى هنا واقف على بابك
على حبة إيمان نبّتت
على وردة فى بستانى فتحت
على شجرة بفروعها ظللت
على قلبى...اللى رايح ليك
أنا ليك و منك و إليك
أنا عبدك جيت أناجيك...
يا رب...يا رب...يارب

5 comments:

Anonymous said...

Gostei muito desse post e seu blog é muito interessante, vou passar por aqui sempre =) Depois dá uma passada lá no meu site, que é sobre o CresceNet, espero que goste. O endereço dele é http://www.provedorcrescenet.com . Um abraço.

Anonymous said...

أبو حميد إزيك يا بني عامل إيه؟. جميلة يا حبيبي ربنا يوفقك إن شاء الله .إنها المناجاة إنها المناجاة إنها المناجاة. مناجاة العبد لربه عندما تخرج من القلب تكون كلمة تكون دمعة تكون مشاعر تكون أحاسيس, تكون وجدان من دون رتوش من غير خدوش من غير وشوش تكون صدق تكون ندم تكون ألم تكون فجر ,تكون ضحي تكون أمل. بارك الله فيك يا ولدي وسدد خطاك .خالتك وَحشة

مصعب الجمال said...

أخي الحبيب صاحب القلب الحنين
أبونضال

كلماتك رائعة ، أحلى مافيها أنها خارجة من قلب صادق

بارك الله فيك

أبو نضال said...

مش ممكن...أنا مش قادر أصدق :))) خالتو نوسى مرة واحدة، أنا برده بقول المدونة كانت منورة بزيادة و أنا داخل عليها :)))

جزاك الله خيرا على التعليق، و يا رب تشرفينا دايما كدا، و ما تحرميناش من دعواتك :))

*******

حبيب قلبى مصعب، و بارك فيك و لك و بك و عليك :)

Unknown said...

أخي الحبيب أحمد ، ما شاء الله من حسن إلى أحسن ، ومن جميل إلى أجمل ، ومن رائع إلى أروع ، ومن عبد الله إلى أحمد ، أراك السبت المقبل الأخير في الشهر ،،